Салтанат Нүкенованың ағасы Айтбек Амангелді сот кулуарында "Қуандық Бишімбаевқа қатысты айыптау актісін қайта қарауы мүмкін бе?" деген сұраққа жауап берді, деп хабарлайды alash.kz.
Айтбек Амангелді Бишімбаевтың айыптау актісін қайта қарауы мүмкін емес деп ойлайтынын айтты. "Мен бұлай болады деп ойламаймын және бұлай болғанын қаламаймын. Негізгі сотталушыға қатысты негізгі айыптау актісі толығымен жасалды, барлық әрекетті және бүкіл уақыт кезеңін толығымен қамтиды. Сондықтан мен негізгі сотталушыға қатысты айыптау актісін өзгерту қажет деп ойламаймын. Адвокаттар да айыптау актісі толық дәлелденген деп санайды және сотта барлық әрекет қамтылып айтылды", - деді ол.
Айта кетейік, мұндай сұрақ прокурордың Байжановқа қатысты айыптауды өзгерту туралы бүгінгі өтінішінен кейін туындады. Еске салайық, бүгін Қуандық Бишімбаев ісі бойынша тараптардың жарыссөзі басталуға тиіс еді, алайда отырыстың түске дейінгі бөлігі бірнеше минутқа ғана жалғасты, айдауыл сотталушыларды әкеліп үлгермеген. Сондықтан судья отырысты 14:30-ға ауыстырды. Түстен кейін мемлекеттік айыптаушы Бақытжан Байжановқа қатысты айыптау бабын өзгертетінін мәлімдеді. Сондай-ақ судья істі қарауды 3 күнге кейінге қалдыру туралы шешім шығарды, бұған Байжанов қорғаушыларының өтініші негіз болды, өйткені прокуратура айыптау бабын өзгерткен еді.
