Мәжіліс депутаты Ринат Зайыт еліміздегі міндетті әлеуметтік медициналық сақтандыру (МӘМС) жүйесіне қатысты өз пікірін айтты. Оның сөзінше, халық төлем жасап отырса да, қажетті медициналық қызметті толық ала алмай келеді, деп хабарлайды Alash.kz. порталы halyquni.media-ға сілтеп.
Журналист қойған сұрақта аймақтарда дәрі жетіспейтіні, қажетті құрылғылар болмайтыны айтылғанда, Ринат Зайыт мәселенің себебі – жүйенің өзі дұрыс жұмыс істемей тұрғанын жеткізді.
Депутаттың айтуынша, халықтан ақша талап етпес бұрын, ең алдымен медицина саласын реттеп алу керек.
«Біз әу баста айттық қой, Алдымен медицина саласын мінсіз қылып жетілдіріп алмай, халықтан қандай да бір төлем талап ету — үйге су тартпай жатып, сол судың ақшасын талап еткенмен бірдей. Үйіңізге су тартылмайды, бірақ сізден ақша сұрай береді. Қашанға дейін жалғасады бұлай?» — деді Ринат Зайыт.
Ол МӘМС жүйесіне бірқатар түзетулер енгізілгенін, бірақ басты өзгерістер салалық министрліктің нақты ынтасы болмайынша жүзеге аспайтынын айтты.
«Бұл жүйе дұрыс жетілмейінше, қандай да бір өзгеріс болады дегенге өз басым сене қоймаймын», — деді ол.
