Маңғыстаудағы қайғылы оқиғадан аман қалған сарбаз әскери борышын өтеп болды, деп жазды Alash.kz.
Маңғыстаудағы әскери оқу-жаттығу кезінде болған қайғылы оқиғадан аман қалған Ақжол есімді сарбаз мерзімді әскери қызметін аяқтады. Бұл туралы қоғам белсендісі Азамат Сәрсенбаев әлеуметтік желідегі парақшасында жазды.
Оның айтуынша, Ақжол – Маңғыстау облысынан әскерге шақырылғандардың арасындағы қайғылы оқиғадан аман қалған жалғыз сарбаз.
«Әдетте сарбаздар үшін мұндай күн қуанышқа, естелік суреттерге, әскери достықтың жылы сәттеріне толы болады. Бірақ бұл жолы олай емес», – деп жазды Азамат Сәрсенбаев.
Жақын уақытта Ақжол ата-анасымен бірге қаза тапқан қаруластарының отбасыларына барып, көңіл айтуды жоспарлап отыр.
Азамат Сәрсенбаев сарбазға бейбіт өмір мен амандық тілеп, қаза болған қаруластарының рухы мен олардың ата-аналары алдындағы жауапкершілікті ұмытпауына тілектестік білдірді.
