АҚШ билігі Николас Мадуродан кейін Венесуэланың тағы қай шенеуніктері Вашингтонның нысанасына ілігуі мүмкін екенін айқындады, деп хабарлайды Alash.kz.
Reuters агенттігінің мәліметінше, Дональд Трамп әкімшілігі елдегі ең ықпалды тұлғалардың бірі, ішкі істер министрі Диосдадо Кабельоға қатаң ескерту жасаған.
Вашингтон Кабельодан уақытша президент Дельси Родригеспен ынтымақтастық орнатуды және Америка тарапының талаптарын орындауды талап етіп отыр. Бұл ескерту делдалдар арқылы жеткізілген және талаптар орындалмаған жағдайда министрді де Мадуроның тағдыры күтуі мүмкін екені айтылған. Сонымен қатар, келесі ықтимал нысаналардың қатарында қорғаныс министрі Владимир Падрино да бар. Ол да, Кабельо да АҚШ-та есірткі саудасы бойынша айыпталуда және оларды қолға түсіруге көмектескендерге қомақты қаржылай сыйақы тағайындалған.
АҚШ тарапы Венесуэланың жаңа басшылығына бірқатар нақты шарттар қойды. Олардың ішінде елдің мұнай секторын америкалық компанияларға ашу, есірткі тасымалына қарсы күресті қатаңдату, кубалық әскерилерді елден шығару және Иранмен әріптестікті тоқтату сияқты талаптар бар.
