Киіз үй ішінде бейәдеп би билеп, көпшіліктің кәріне ұшырағандарға қатысты қоғам белсенділері пікір білдірді. Журналист Ерқанат Көпжасар полиция өкілдерінің дәрменсіздігіне шағымданса, ел арасында "Нұрлан имам" есімімен танымал дінтанушы, теолог, психолог Нұрлан Байжігітұлы "Киіз үйім менің ұлтымның өткені бүгіні һәм ертеңі…" деп баға берді. Бұл жайлы Alash.KZ ұлттық порталы хабарлайды.
Журналист Ерқанат Көпжасар киіз үйде ұлттық киіммен жартылай жалаңаш билеген бишілердің әрекетін сынға алып, полиция өкілдерінің дәрменсіздігіне шағымданды.
Мына бишілердің бірі еркек дейді. Қазақты барынша арандатып жатыр. Үшінші фронт ашқысы келетін арам ниеттілердің тірлігі. Төзімдері қай жерде тарс етеді деп көргісі келеді. Бұған үн қатпадыңдар деп айтақтап отыр кейбіреулер. Ал үн қаттық дейікші. Сонда елдегі қызтекелердің бәрін қырып тастауымыз керек пе әлде Қазақстандағы әр киіз үйдің ішіне ЛГБТ-лар билемесін деп күзет қоюымыз керек пе?! Неге полиция жұмыс істемейді. Неге желідегі үш-төрт адам ғана шуылдап қою керек?! Меніңше құзырлы органдар ұлттық құндылық пен дәстүрді қорлағандарды “ұлтаралық араздық қоздырды” деп заңмен жауапкершілікке тарту керек.
Танымал дінтанушы, теолог, психолог Нұрлан Байжігітұлы "Киіз үйім менің ұлтымның өткені бүгіні һәм ертеңі…" деп баға берді.
Киіз үйім менің ұлтымның өткені бүгіні һәм ертеңі… «Атамыз - Алаш, керегеміз - ағаш» , «Киіз туырлықты, ағаш уықты қазақпыз»… - деді.
Мәдениет және ақпарат министрі Аида Балаева киіз үйде көпшілікке жақпайтын сипатта би билеп, бейәдеп, анайы әрекетімен қоғам назарын аудартқан бейнеролик туралы пікір білдірді. Өз сөзінде ұлттық құндылықтарымызға сызат түсіретін бейнероликтерге жол берілмейтінін хабарлады.
Құрметті достар! Өздеріңізге мәлім, Ата заңымызда барлық азаматтың құқығы тең, олардың ар-намысы мен қадір-қасиетін құрметтеуге кепілдік берілген.
БАҚ пен әлеуметтік желілердің маңызы арта түскен қазіргі кезде қандай контент жасалып, бөлісіліп жатқанына ерекше мұқият болуымыз керек. Адамдардың көңіліне қаяу салып, мәдени және ұлттық болмысымызға сызат түсіретін жазбалар мен бейнероликтерге жол берілмейді.
Осы орайда, ҚР Мәдениет және ақпарат министрі ретінде киіз үйде би билеп, бейәдеп әрекетімен қоғам назарын аудартқан бейнеролик туралы айтқым келеді. Мұндай контент қоғамда алауыздық тудыруы мүмкін. Арандатушылыққа да ұрындыруы ықтимал. Әрине, өскелең ұрпақ тәрбиесіне кері әсерін тигізеді. Видеоның мазмұны қазақ халқының құндылықтары мен салт-дәстүрлеріне қайшы келеді, - деп жазды министр.
Аида Балаева Ұлттық құндылықтардан бас тарту мәдениетімізге, салт-дәстүрімізге және әдет-ғұрыптарымызға қашан да қауіп төндіретінін айтып, бірлігіміз бен тұрақтылығымыздың мызғымас негізін сақтау ортақ парызымыз екенін мәлімдеді.
Тағы бір мәселе өте маңызды. Мемлекеттік әлеуметтік тапсырыстар дәстүрлі құндылықтарымызды сақтау мен насихаттауда ерекше жауапкершілікті талап етеді. Ұлттық құндылықтардан бас тарту мәдениетімізге, салт-дәстүрімізге және әдет-ғұрыптарымызға қашан да қауіп төндіреді.
Ал бірлігіміз бен тұрақтылығымыздың мызғымас негізін сақтау – ортақ парызымыз.
Мен медиа-процесте жүрген барша адамдарды контент жасауда мұқият болуға шақырамын. Кез келген шығармашылық жұмыста ұлттық салт-дәстүр мен құндылықтарды құрметтеуге басымдық таныту керек.
Жұдырықтай жұмылып, бірлесе жұмыс істеп қана халқымыздың басын біріктіріп, бөлшектеуге болмайтын бай мәдени мұрамызды сақтап қала аламыз, - деп жазды Аида Балаева Фейсбуктегі парақшасында.
Еске сала кетейік, кеше әлеуметтік желіде 2 қыз бен ер жігіттің киіз үйде жартылай жалаңаштана би билеп, бейәдеп қылықтар жасаған бейнеролигі тарады. Бейнероликті көрген қазақстандықтар ашынып, ұлттық құндылықтарды қорлауға тырыспақ болғандарға қарсы пікір білдіріп жатыр.
