Абай облысында кассациялық сатыдағы сот адам өмірін құтқару мақсатында жасалған әрекетке қатысты шығарылған бұрынғы үкімді қайта қарады, деп жазады Alash.kz.
Абай облысының тұрғыны 2024 жылдың жазында күйеуіне шабуыл жасаған ер адамды ағашпен ұрып, абайсызда оның өліміне себеп болған еді. Жоғарғы сот инстанциясы істің мән-жайын зерттей келе, әйелдің әрекетін қажетті қорғаныс шегінен шығу деп танып, оны қамаудан босату туралы шешім қабылдады.
Оқиға осыдан екі жыл бұрын шілде айында болған. Жанжал кезінде белгісіз ер адам сотталушының күйеуін тұншықтыра бастаған. Жұбайын ажалдан арашалап қалмақ болған әйел қолына түскен ағаш кесіндісімен шабуылдаушыны басынан ұрған. Соққы салдарынан зардап шеккен азамат оқиға орнында көз жұмды. Алғашқы сатыдағы сот бұл оқиғаны ауыр қылмыс деп бағалап, әйелді алты жылға жалпы режимдегі колонияға жіберген болатын.
Алайда кассациялық сот істі қарау кезінде бірнеше жеңілдетуші жағдайларды негізге алды. Сотталушының өз ісіне өкінуі, денсаулық жағдайына байланысты мүгедектігі және асырауында жас баласының бар екені ескерілді. Сонымен қатар сот әйелдің ниеті кісі өлтіру емес, тек өз жақынын қорғау болғанын назарға алды. Осы факторлардың нәтижесінде бұрынғы үкім өзгертіліп, жаза мерзімі бір жылға дейін қысқартылды.
Сотталушы тергеу және сот процесі кезінде бір жылдық мерзімді изоляторда өтеп қойғандықтан, жаңа үкім жарияланған сәтте ол бостандыққа шықты. Бұл шешім заңды күшіне еніп, әйел сот залынан тікелей үйіне қайтты.
