Жібек жолы ауылында орын алған бір отбасының өліміне қатысты күдіктінің бұрын сотты болғаны анықталды, деп хабарлайды Alash.kz.
Ішкі істер министрінің орынбасары Санжар Әділов аталған қылмыс бойынша тергеу амалдарының барысы туралы ресми мәлімет берді.
Қазіргі уақытта құзырлы органдар кісі өлтіру бабы негізінде қылмыстық іс қозғап, оқиғаны аса ауыр қылмыстар санатына жатқызды.
Министр орынбасары Санжар Әділов күдіктінің ұсталғанын растап: «Күдікті ұсталды. Соттың санкциясымен ол күзетпен ұстауға алынып, екі айға қамауға алынды. Қазіргі уақытта қажетті тергеу амалдары жүргізіліп жатыр. Қосымша тергеу шаралары оқиға орнында да өтіп жатыр, онда жедел-тергеу тобы жұмыс істеуде», — деп мәлімдеді.
Ішкі істер министрлігі күдіктінің бұған дейін нақты қандай заң бұзушылық үшін жауапқа тартылғанын ашып айтпады. Сонымен қатар, ведомство өкілі қайтыс болғандардың бірнеше адам екенін және олардың жеке басы толық анықталғанын растап отыр. Оқиға орнында жедел-тергеу тобы жұмысын жалғастыруда.
