АҚШ әуе күштері Венесуэлаға әуе соққысын жасады. Жергілікті уақыт бойынша түнгі сағат 02:00-де басталған шабуыл барысында бірнеше стратегиялық нысанға зақым келген, деп хабарлайды Alash.kz.
Әуе соққыларына Форт-Тиуна әскери базасы, генералиссимус Франсиско де Миранда атындағы әскери аэродром, Варгас штатындағы Ла-Гуайра әскери-теңіз базасы және Кариб теңізіндегі Маргарита аралы ұшыраған. Сонымен қатар Игуэроте әуежайы маңында әскери қоймалардағы оқ-дәрілердің екінші мәрте жарылыстары тіркелді.
Шабуыл кезінде Венесуэла қорғаныс министрінің үйі де нысанаға алынды. Жергілікті тұрғындар көшелерде автоматтан оқ атылғанын хабарлады. Елдің әуе кеңістігі толықтай жабылған. Каракас маңында АҚШ әскери тікұшақтары ұшқаны видеоға түсірілген, бірақ олардың соққы жасау немесе десант тасымалдау үшін қолданылғаны әзірге белгісіз.
Колумбия президенті Петро оқиғаға байланысты:
«Қазір Каракас шабуылға ұшырап жатыр. Венесуэлаға зымырандық шабуыл жасалды. Америка мемлекеттер ұйымы мен БҰҰ шұғыл түрде отырыс өткізуі тиіс», – деп мәлімдеді.
Оқиғаның толық мән-жайы мен халықаралық реакциясы әзірге белгісіз.
