Атырауда психиатр дәрігерлер науқастың жағдайының ушығуын елемеген. Нәтижесінде оқиға адам өлімімен аяқталды, деп хабарлайды Alash.kz.
Бұл жағдай Атырау облысының мамандандырылған ауданаралық қылмыстық істер сотында үкім шыққаннан кейін белгілі болды.
Трагедия биыл 8 маусымда Құрманғазы ауданы, Каспий ауылында орын алған. Бірнеше жыл бойы шизофрения диагнозымен есепте тұрған ер адам көршісіне шабуыл жасап, оған 27 пышақ жарақатын салды. Оқиға үй ауласында, зардап шеккеннің отбасының көз алдында болды.
Сот материалдарына сәйкес, ер адамның туыстары бірнеше жыл бойы оның агрессивті мінез-құлқына және пышаққа қол созатын әрекеттеріне төтеп беруге тырысқан. Дегенмен, Психикалық денсаулық орталығының дәрігерлері науқастың жағдайы «жақсарып келеді» деп сендіріп, оны үйге шығарып жіберуді жалғастырған.
Адам өлтіргеннен кейін сот ер адамды өз әрекеттері үшін жауапқа тартылмайтын деп танып, мәжбүрлі емдеуге жіберді. Сонымен қатар, трагедияға себеп болған дәрігерлерге қатысты сот жеке қаулы шығарды. Құжатта олардың салғырттығы атап өтіліп, кінәлілерге шара қолдану міндеттелген.
