Алматы облысында өртенген күйде табылған полицейдің өлімі: жаңа мәліметтердің бір бөлігі ресми расталған жоқ
Алматы облысында денесі өртенген күйде табылған полиция қызметкері Аслан Әлсеровтің өліміне қатысты жаңа мәліметтер тарады. Алайда жарияланған ақпараттың едәуір бөлігі әзірге құқық қорғау органдары тарапынан ресми түрде расталған жоқ.
Алдын ала мәліметтерге сәйкес, оқиға Полиция күні қарсаңында болған. Сол күні марқұм жұмыстан үйіне кеш оралғаннан кейін отбасында жанжал туындап, оның соңы төбелеске ұласуы мүмкін.
Бейресми ақпаратта Аслан Әлсеров пен жұбайының арасында бұған дейін де тұрмыстық кикілжіңдер болғаны айтылғанымен, бұл жөнінде құқық қорғау органдары ресми түсініктеме берген жоқ.
Тергеу болжамдарының біріне сәйкес, жанжал кезінде үйге әйелдің 15 жастағы екі ұлы мен олардың 14 жастағы танысы келген. Жасөспірімдердің бірі полицейдің басынан қатты затпен ұруы мүмкін деген нұсқа қарастырылып жатыр. Қазіргі уақытта тергеушілер соққының нақты қандай затпен жасалғанын анықтауда.
Сондай-ақ ес-түссіз жатқан ер адамның қол-аяғы байланып, денесі көрпеге немесе жаймаға оралған күйде көлікпен Алматы облысының Кеген ауданына жеткізілген болуы мүмкін деген ақпарат тарады. Болжам бойынша, күдіктілер Көкпек – Көктал – Кеген тас жолынан тауға қарай шамамен жарты шақырым жүріп, сол жерде мәйітті өртеген.
Марқұмның денесін тауда жоғалған малын іздеп жүрген жергілікті тұрғын тауып, полицияға хабарлаған.
Қылмыстың барлық мән-жайын анықтау үшін сот-медициналық сараптамалар тағайындалды. Сонымен қатар тергеу аясында ерлі-зайыптылардың ұялы телефондары да тексерілмек.
Алдын ала мәліметтерде Арайлым Әлсерова, оның екі ұлы және 14 жастағы жасөспірімнің ұсталғаны айтылған. Сондай-ақ олардың уақытша ұстау изоляторына қамалғаны және кінәсін мойындағаны туралы ақпарат тараған. Алайда бұл деректерді ресми органдар толық растаған жоқ.
Аслан Әлсеров полиция органдарында шамамен он жыл қызмет еткен. Ол арнайы жедел әрекет ету бөлімінде жұмыс істеп, кейін Алматы қаласы Әуезов аудандық полиция басқармасының қылмыстық полиция бөлімінде аға детектив қызметін атқарған.
Еске сала кетейік, Қазақстан заңнамасына сәйкес, соттың заңды күшіне енген үкімі шыққанға дейін күдіктілер кінәсіз деп есептеледі.
