Марқұм әнші Ақжол Мейірбековтің қызы Сұлтан әкесінің өмірінің соңғы кезеңдері туралы айтып берді, деп жазды Alash.kz.
«Көреміз» ток-шоуында сөйлеген Сұлтанның айтуынша, әкесі сырқаты асқынған кезде шетелде емделу мүмкіндігі болғанымен, халықтан қаржы жинауға қарсы болған.
– Әкем өмірден өтемін деп ойлаған жоқ. Қазақстандық дәрігерлерге қатты сенді. Біз халықтан ақша жинап, шетелге апарып емдетуді ойладық. Бірақ папам: «Қажеті жоқ, қай бетіммен адамдардан ақша аламын, ұят қой», – деп келіспеді. Дәрігерлер де емдеу хаттамалары бірдей екенін айтып, сендірді, – дейді ол.
Сұлтанның сөзінше, әнші аурумен ұзақ уақыт күресіп, 18 мәрте химиотерапия курсынан өткен.
– Әкемнің соңғы аманаты «Жақсы, түзу жүріңдер» деген сөз болды. Қатты қиналып, сырқаттанса да, сахнадан қол үзген жоқ. Әнін айтып, елдің алдында барынша көңілді жүруге тырысты, – деді әншінің қызы.
Оның айтуынша, Ақжол Мейірбеков өмірінің соңына дейін өнерден алыстамай, көрерменіне деген құрметін сақтап өткен.
