Қазақстандық танымал тревел-блогер Дастан Мұхамедрахым Испанияның Мадрид қаласында әйгілі бапкер Жозе Моуриньюмен кездесіп, оған отандық өнім мен қазақы дәстүрді таныстырды, деп хабарлайды Alash.kz.
Атақты «Реал Мадрид» клубының бұрынғы бас бапкерімен болған бұл ерекше жүздесуге блогердің әлеуметтік желідегі белсенділігі себеп болған. Дастанның айтуынша, оның видеоларын байқаған Coca-Cola компаниясының өкілдері арнайы байланысқа шығып, блогерді Мадридке шақырған. Шақыртумен қатар, аңызға айналған бапкерге дәм татқызу үшін өзімен бірге Қазақстанда өндірілген Coca-Cola сусынын ала келу ұсынылған.
Кездесу барысында футбол маманы қазақстандық өнімнің дәмін татып қана қоймай, блогер сыйға тартқан ұлттық шапанды иығына киіп көрді. Әлемдік деңгейдегі бапкермен естелік суретке түскен соң, Дастан Мұхамедрахым әлеуметтік желідегі парақшасында толқынысын жасырмай, келесідей төл сөзін қалдырды:
«Тағы бір ерекше жаңалық! Жақында ғана сіздерге Қазақстанның көпшілік біле бермейтін мақтан тұтар жетістіктерін көрсетіп жүрген едім. Ал бүгін, міне, аты аңызға айналған Жозе Моуриньюдің өзіне Қазақстан туралы айтып тұрмын. Мен үшін бұл – ерекше әрі ұмытылмас сәт», – деп жазды блогер.
Осылайша, отандық блогер әлемдік спорт саңлағына еліміздің мақтан тұтар тұстары мен ұлттық құндылықтарын насихаттап қайтты.
