Қазақстанның тұңғыш президентінің немересі Нұрәли Әлиев мектеп бағдарламасындағы «Өзін-өзі тану» пәнін қолдауды және одан әрі жетілдіруді жоспарлап отырғанын мәлімдеді, деп жазады Alash.kz.
Бұл курстың авторы әрі негізгі идеялық жетекшісі оның нағашы әжесі – Сара Назарбаева. Кәсіпкер өз сұхбаттарының бірінде өскелең ұрпаққа рухани-адамгершілік бағытта тәрбие берудің өзектілігіне тоқталып, осы бастаманы алдағы уақытта да жалғастыруға ниетті екенін жеткізді.
Бізде «Өзін-өзі тану» сабағы болды ғой. Оны менің әжем Сара Алпысқызы бастап берген. Ол кісі, жалпы, біздің отбасымызда рухани практикалармен айналысқан ең алғашқы адам. Олар таңертең тауға шығып, өзенге сүңгитін. Яғни, мұның бәрін мен шынымен де бала күнімнен көріп өстім. Иә, бұл маған қазір ғана жетіп жатыр. Көрсетіп отырғандай, мұның бәрі менің бойыма баяғыда-ақ ұялаған екен. Мектептерде болған «Өзін-өзі тану» сабағы іс жүзінде өте үлкен тиімділік көрсетті. Мен мұны осы пәнді оқыған адамдардан анық көріп жүрмін. Тіпті қазір маған жолығып, «менің жолым осыдан (осы сабақтан) басталды» дейтін адамдар өте көп кездеседі. Өзін-өзі тану — тамаша нәрсе. Өйткені ол балаға ішкі діңгек береді. Ол ертеңгі күнге деген сенімділікті, әлемнің қалай жаратылғанын, Жаратқанның кім екенін және өзінің кім екенін түсінуге мүмкіндік береді. Өкінішке қарай, бұл сабақты қазір мектеп жүйесінен алып тастады. Бәлкім, қандай да бір саяси шешімдермен шығар. Бірақ мен қазір бұл сабаққа көбірек үңіліп жүрмін және оны халықаралық аренада дамытуды жоспарлап отырмын, өйткені ол өте қажет. Мен өзін-өзі тануды әрі қарай өз платформамда өз базамызда дамытатын боламын. Себебі балаларға білім беру — ең маңызды нәрсе. Егер қоғамды өзгерткіңіз келсе, балаларға дұрыс тәрбие мен білім... Өкінішке қарай, мектептерде қарапайым нәрселерді үйретпейді, білесіз бе, тіпті асханаларда немен қоректенетініне, тамақтың қандай екеніне, жалпы, мұғалімдердің қандай екеніне қарау керек. Өйткені, ең алдымен, балаларды дұрыс өмір сүруге үйрету қажет. Тіпті ересектердің өзіне де қалай тамақтану керек, қалай өмір сүру керек екенін, яғни осындай негізгі нәрселерді іс жүзінде ешкім үйретпейді. Ал әрі қарай әр бала өз қызығушылығын табуы тиіс.
Еліміздің оқу бағдарламасына айтарлықтай өзгеріс әкелген бұл пән алғаш рет 2010–2011 оқу жылында мектептерге міндетті курс ретінде енгізілген болатын. Сара Назарбаеваның бастамасымен әзірленген жоба балалардың бойында ізгілік, мейірімділік пен ішкі үйлесімділікті қалыптастыруды мақсат етті.
Алайда арада он жылдан астам уақыт өткенде, нақтырақ айтқанда 2022 жылы Қазақстан Республикасының Оқу-ағарту министрлігі бұл пәннің оқытылу форматын қайта қарастырды. Арнайы бұйрық негізінде «Өзін-өзі тану» сабағы міндетті пәндер тізімінен толықтай шығарылып, таңдау бойынша өтетін факультативтік деңгейге ауыстырылған болатын. Нарық пен қоғамда бұл пәннің болашағы туралы пікірталастар әлі де толастамай келеді.
