Қазақмыс корпорациясы өндірістік қауіпсіздікті арттыру мақсатында жерасты кеніштерінде қолданылатын жаңа арнайы техникаларды сынақтан өткізіп жатыр. Компания мәліметінше, қазіргі таңда күрделі шахталық жағдайда жұмыс істеуге арналған заманауи көліктер тәжірибелік-өнеркәсіптік тексеруден өтуде, деп жазады Alash.KZ
Сынаққа шығарылған техника Beijing Automobile Works компаниясының BAW маркасымен шығарылған. Арнайы көліктер тар әрі орташа көлемдегі жерасты қазбаларында жұмыс істеуге бейімделген және қауіпсіздік талаптарына сай жаңартылған жүйелермен жабдықталған.
Жаңа техниканың басты ерекшеліктерінің бірі – қызметкерлердің қауіпсіздігін күшейтуге бағытталған қорғаныс тетіктері. Көліктерде аударылу немесе жоғарыдан зат құлау кезінде адамды қорғайтын ROPS/FOPS халықаралық сертификатталған қорғаныс құрылымы орнатылған. Сонымен қатар 360 градус панорамалық бейнебақылау жүйесі, күшейтілген тежегіш, автоматты жылдамдық шектеу функциясы және техниканың техникалық жағдайын үздіксіз бақылау құралдары қарастырылған.
Компания өкілдерінің айтуынша, бұған дейін кеніштерде қолданылған әмбебап көліктермен салыстырғанда жаңа арнайы техника күрделі өндірістік ортаға әлдеқайда бейім. Ол сенімді жұмысымен, техникалық қызмет көрсету шығындарының төмендігімен және ауыр жағдайда тұрақты өнімділік көрсетуімен ерекшеленген.
Алғашқы сынақ қорытындылары жаңа көліктердің еңбек қауіпсіздігін арттыруға, жабдықтардың бос тұрып қалуын азайтуға және өндірістік процестің тиімділігін көтеруге мүмкіндік беретінін көрсетті.
Қазіргі уақытта Қазақмыс корпорациясы жаңа техникаларды компанияның түрлі өндірістік алаңдарына кезең-кезеңімен енгізу мүмкіндігін қарастырып жатыр. Корпорация мұндай жаңғырту шаралары өнеркәсіптік қауіпсіздік стандарттарын күшейтіп қана қоймай, өндіріс сапасын да жаңа деңгейге шығаруға ықпал етеді деп есептейді.
