Айтыскер ақын әрі бұрынғы Мәжіліс депутаты Ринат Зайыт Қорғаныс министрлігіне қарасты Ұлттық әскери-патриоттық орталыққа жұмысқа орналасқанын мәлімдеді, деп хабарлайды Alash.kz.
Бұрынғы халық қалаулысы бұл қуанышты жаңалығымен YouTube желісіндегі Adal ADAM арнасына берген ашық сұхбатында бөлісті.
Оның айтуынша, бұл қызметке тағайындалуы жуырда ғана ведомство басшылығына келген жаңа министрдің ұсынысымен жүзеге асқан. Ринат Зайыт жаңа жұмыс орны мен атқаратын міндеттерін былайша баяндап берді:
«Қазанның басында жаңа Қорғаныс министрінің шақыртуымен Қорғаныс министрлігіне қарасты Ұлттық әскери-патриоттық орталыққа келдім. Бұл орталық әскери ансамбль, оркестр, патриоттық және мәдени іс-шараларды ұйымдастыруға жауапты», – деді ол.
Сондай-ақ экс-депутат өз сөзінде аталған орталықтың негізгі бағытына тоқталып, мекеменің әскери-патриоттық бағыттағы ауқымды мәдени шараларды ұйымдастырумен қатар, әскери шығармашылық ұжымдардың тыныс-тіршілігін үйлестірумен айналысатынын атап өтті.
Айта кетейік, 2026 жылғы 27 қыркүйекте Мемлекет басшысының Жарлығымен Айдос Мырзахметов Қазақстан Республикасының Қорғаныс министрі болып тағайындалған болатын.
