АҚШ президенті Дональд Трамп Иранмен әскери қақтығыс қайта басталса, оның салдары өте ауыр болатынын мәлімдеді, деп хабарлайды Alash.kz.
Truth Social әлеуметтік желісінде жариялаған жазбасында Трамп Иранның қазіргі әрекеттерінен сабақ алмағанын айтып, қажет болған жағдайда АҚШ әскери операцияны қайта жалғастыратынын жеткізді.
«Олар ешқандай сабақ алмауы мүмкін. Егер ақылға қонымды әрекет ету мүмкін болмай қалса, біз бастаған істі әскери жолмен толық аяқтауға мәжбүр боламыз. Егер солай болса, Иран Ислам Республикасы өмір сүруін тоқтатады», – деп жазды Трамп.
Сонымен қатар АҚШ тарапы Иран аумағындағы әскери нысандарға жасалған операцияның аяқталғанын хабарлады.
Бұған дейін Дональд Трамп Иранды Ормуз бұғазындағы атысты тоқтату режимін бұзды деп айыптаған болатын. Оның айтуынша, Тегеран бұғаз арқылы өтіп бара жатқан сауда кемелеріне кемінде төрт камикадзе-дрон ұшырған.
Кейін АҚШ әскері Ормуз бұғазы маңындағы Иран нысандарына қайтадан әуе соққыларын жасады. Axios басылымының мәліметінше, бұл шабуылдарға Иранның сауда кемесіне жасаған шабуылы себеп болған.
