FlyArystan билет бағасы ауа райына байланысты өзгеріп тұра ма? (ВИДЕО)

Журналист Асхат Ниязов әлеуметтік желіде FlyArystan әуе компаниясының баға саясатына қатысты наразылық білдірді, деп жазады Alash.KZ.

Ол Алматыдан Семейге билет құны 45 мың теңгеге жеткенін айтып, әсіресе қол жүгінің салмағы 5 келіден асса, қосымша ақы тым қымбат екенін сынға алды.

«Бұрын 10-11 мың теңге болса, қазір 14 мың теңге талап етеді. Оны кейде «ауа райына байланысты» деп түсіндіреді. Бірақ бізге уәде еткен арзан билеттер қайда?» – деп қынжылды Асхат Ниязов.

FlyArystan әуе компаниясы қол жүгінің нормасын 5-тен 10 келіге дейін ұлғайту бағасы 2025 жылдың жазында 500 теңгеге ғана өскенін мәлімдеді.

Қызмет құны сатып алу уақытына байланысты:

• билетпен бірге алынса – 7 116 теңге,
• онлайн рәсімделсе – 11 500 теңге,
• тіркеу кезінде – 12 000 теңге,
• ұшуға 40 минут қалғанда – 14 000 теңге.

Әуе компаниясы тарифтер ауа райына байланысты өзгермейтінін, баға динамикалық тәсілмен – бағыт, рейстің жүктемесі, сұраныс деңгейі және сатып алу уақытына қарай анықталатынын атап өтті.