«Ешқандай қоңырау шалынған жоқ»: ІІМ басшысы Каспийдегі қайғылы оқиғаға қатысты Threads жазбалары үшін қазақстандықтарға полиция хабарласқанын жоққа шығарды, деп жазды Alash.kz.
Ішкі істер министрі Ержан Саденов Каспийдегі қайғылы оқиғаға қатысты Threads әлеуметтік желісіндегі жазбалары үшін қазақстандықтарға полиция қызметкерлері хабарласқаны туралы ақпаратты жоққа шығарды.
«Ешқандай қоңырау шалынған жоқ. Оның үстіне ішкі істер органдарының қызметкерлері Маңғыстау облысында және бүкіл ел бойынша қоғамдық тәртіпті тиісті деңгейде қамтамасыз етті», – деді министр.
Бұл сұрақ әлеуметтік желі қолданушыларының полиция тарапынан қысым болғаны туралы шағымдарынан кейін қойылды.
Солардың ішінде Темірлан есімді қолданушының оқиғасы әлеуметтік желіде кең талқыланған. Ол полиция қоңырауының аудиожазбасын жариялағанымен, кейін жазбаны өшірген. Өз сөзінде оның үйіне полиция қызметкерлері келгенін айтқан.
