Павлодар облысында екі үйден екі адамның мәйіті табылды, деп хабарлайды Alash.kz ұлттық порталы.
Павлодар облыстық полиция департаменті Павлодар облысында көрші орналасқан екі үйден екі адамның мәйіті табылғанын растады.
Алдын ала мәлімет бойынша, оқиға Майқайың кентінде болған. Табылған адамдардың бірі шамамен екі жыл бұрын, екіншісі бірнеше ай бұрын көз жұмған болуы мүмкін деген болжам бар.
Полиция аталған дерек бойынша қылмыстық іс қозғалғанын хабарлады. Қазіргі уақытта оқиғаның барлық мән-жайын анықтауға бағытталған тергеу әрекеттері жүргізіліп жатыр.
Жергілікті тұрғындардың айтуынша, мәйіттердің бірі қарт әйелдің үйінен, екіншісі көрші үйден табылған. Бейресми мәліметке сәйкес, олар сол әйелдің туыстары болуы мүмкін. Алайда бұл ақпарат әзірге ресми түрде расталған жоқ.
Ауыл тұрғындарының сөзінше, аталған отбасы жұртпен көп араласпаған. Қарт әйелмен бірге кәмелетке толмаған немересі тұрғаны айтылды.
