Екібастұз қаласында тұрғын үйлердің бірінің ауласындағы гаражда синтетикалық есірткі өндірумен айналысқан ағайынды екі жігіт қолға түсті, деп жазады Alash.KZ
Күдіктілер есірткіні өте ірі көлемде дайындауды жолға қойған. Құқық қорғау органдары тінту шаралары барысында заңсыз айналымнан мынадай заттарды тәркіледі:
- 10 келіден астам дайын психотроптық зат;
- 860 литрден астам түрлі химиялық сұйықтықтар (прекурсорлар);
- Арнайы зертханалық құрал-жабдықтар, электронды таразылар және жеке қорғаныс киімдері.
Тергеу мәліметтеріне сәйкес, жасырын зертхананың жұмысын сырттан белгісіз куратор «Signal» мессенджері арқылы басқарып отырған. Ол есірткі дайындаудың әрбір кезеңін қадағалап, шикізат тығылған жасырын орындардың (закладка) координаталарын жіберіп тұрған.
Қазіргі уақытта екі күдікті де уақытша ұстау изоляторына қамалып, сотқа дейінгі тергеу амалдары басталды. Заңсыз есірткі зертханасын ұйымдастырғандарға қатысты заңнама өте қатал. Олар мүлкі тәркіленіп, өмір бойына бас бостандығынан айырылуы мүмкін.
