Батыс Қазақстан облысындағы Сырым ауданында тоғыз жасар бала өртеніп жатқан тұрғын үйден екі інісін аман алып шықты, деп хабарлайды Alash.kz.
Аудандық төтенше жағдайлар бөлімі берген ресми мәліметке сәйкес, оқиға 16 ақпан күні сағат 10:00 шамасында тіркелген. Шақырту бойынша жеткен жеке құрам өртті 20 минут ішінде толық сөндіргенімен, қатты жану салдарынан баспана тұруға жарамсыз күйге түскен.
Оқиға кезінде үйде 9 жасар Бейбарыс есімді бала екі жастағы және сегіз айлық інілерімен бірге болған. Теледидар көріп отырған сәтте электр жарығының кенеттен өшіп қалуы оқиғаның алғашқы белгісі болған. Артынша көрші бөлмеден түтін шығып, өрттің тұтанғанын көрген Бейбарыс жедел әрекет етіп, бір інісін жетектеп, екіншісін көтеріп сыртқа шығарған.
Өрт салдарынан баспанасыз қалған отбасына жергілікті әкімдік тарапынан уақытша тұратын орын бөлінді. Сонымен қатар аудан әкімі Бейбарыстың көрсеткен ерлігі үшін оған ресми түрде алғыс хат табыстады.
