АҚШ Иран ұсынған қақтығысты реттеу және соғысты тоқтатуға арналған 14 тармақтан тұратын жоспарды қабылдамай тастады, деп жазды Alash.kz.
Басылым мәліметінше, Вашингтон Тегеранға жазбаша жауап жолдап, Иран тарапынан ұсынылған барлық шарттарды кері қайтарған. Осылайша АҚШ өз ұстанымын өзгеріссіз қалдырып, қысым көрсету саясатын жалғастырып отырғанын аңғартты.
«Тегеранның ұсыныстарын қабылдамай, АҚШ тағы да өзінің қысым көрсетуге негізделген ұстанымын көрсетті. Әсіресе бұл ядролық мәселе төңірегінде анық байқалды», – деп жазды Tehran Times.
Иран ұсынған жоспар екі кезеңнен тұратын келіссөздер жүйесіне негізделген. Бірінші кезеңде барлық бағыттағы әскери әрекеттерді толық тоқтату көзделген. Ал Тегеран қойған негізгі шарттар орындалғаннан кейін ғана Иранның ядролық бағдарламасына қатысты келіссөздердің екінші кезеңіне көшу ұсынылған.
Алайда әзірге АҚШ тарапы бұл ақпаратты ресми түрде растаған жоқ. Сонымен қатар Иран ұсынған 14 тармақтан тұратын жоспардың толық мәтіні де жарияланбаған.
Бұған дейін Иран америкалық ұсыныстарға қатысты өз жауабын тараптар арасындағы келіссөздерде делдал қызметін атқарып отырған Пәкістан арқылы жолдағаны хабарланған еді.
АҚШ президенті Donald Trump жуырда Иранның ұсыныстарын сынға алып, Тегеран «ойын ойнап отыр» деп мәлімдеген болатын. Америкалық БАҚ-тың хабарлауынша, Ақ үй ықтимал келісімнің басты шарты ретінде Иранның ядролық бағдарламасына қатаң шектеулер енгізуді талап етуді жалғастырып отыр.
