Шығыс Қазақстан облысының Глубокое ауданына қарасты Бобровка ауылында орын алған жойқын өрт салдарынан үш адам қаза болды, деп хабарлайды Alash.kz.
Тілсіз жау жеке тұрғын үйді шарпыған сәтте құтқарушылар шұғыл жеткенімен, ғимарат толығымен өртке оранып, төбесі опырылып түскен. Барлау және өртті ауыздықтау жұмыстары кезінде үйдің ішінен үш адамның мәйіті табылды.
Оқиғаға қатысты Шығыс Қазақстан облысының Төтенше жағдайлар департаменті өкілдері: «Өртті сөндіру кезінде әйел мен екі кәмелетке толмаған баланың денесі анықталды. Қазіргі уақытта өрттің шығу себебі анықталып жатыр», — деп ресми мәлімдеме жасады.
Ауыл тұрғындарының берген мәліметінше, ажал құшқан бүлдіршіндердің үлкені небәрі 3 жаста, ал кішісі 1,5 жаста болған. Қаралы жағдай орын алған отбасы Бобровка ауылына жақында ғана көшіп келген екен. Алдын ала тараған дерек бойынша, қайғылы оқиға кезінде отағасы жұмыста болған.
Қазіргі уақытта тілсіз жаудың неден тұтанғаны белгісіз. Құзырлы органдар қайғылы жағдайдың толық мән-жайын анықтау үстінде.
