Дастан Сатпаев «Челси» сапында алғашқы халықаралық матчын өткізуі мүмкін, деп хабарлайды ALASH.KZ.
Қазақстандық шабуылшы Дастан Сатпаев Лондонның Chelsea F.C. негізгі құрамындағы алғашқы халықаралық ойынын өткізуі мүмкін.
28 шілдеде «Челси» Австралияның Western Sydney Wanderers FC командасымен жолдастық кездесу өткізеді. Матч Қазақстан уақытымен сағат 14:45-те басталады. Егер бапкерлер штабы жас шабуылшыға сенім артса, бұл оның «көгілдірлер» сапындағы халықаралық деңгейдегі алғашқы ресми емес кездесуі болмақ.
Бұған дейін Дастан Сатпаев «Челси» құрамында Англияның Crawley Town F.C. клубына қарсы жабық жолдастық ойында алаңға шыққан. Алайда бұл кездесу клубтың Кобхэмдегі жаттығу базасында өтіп, жанкүйерлер үшін қолжетімді болмаған.
Австралиялық клубпен кездесуден кейін «Челсиді» маусым алдындағы турнир аясында Англияның Tottenham Hotspur F.C., Италияның Juventus FC және AC Milan, Малайзияның Johor Darul Ta’zim F.C., сондай-ақ Испанияның Real Sociedad командаларына қарсы жолдастық матчтар күтіп тұр.
Еске салайық, Дастан Сатпаев қазір «Челсимен» бірге Австралиядағы маусым алдындағы турнирге қатысып жатыр. Бұған дейін әлеуметтік желілерде лондондық клуб жанкүйерлерінің қазақстандық футболшыны іздеп, жаттығу кезінде түсірген видеолары кеңінен тараған.
