Жетісу облысы аумағындағы республикалық маңызы бар тасжолда екі жеңіл автокөліктің қатысуымен орын алған сұмдық жол апаты салдарынан бес адам оқиға орнында тіл тартпай кетті, деп хабарлайды Alash.kz.
Өңірлік Полиция департаментінің баспасөз қызметі таратқан ресми мәліметтерге сүйенсек, ажал апаты 26 маусым күні кешкі уақытта Алматы – Өскемен автокөлік жолының 432-шақырымында болған. Тасжол бойында қос көлік өзара қатты соқтығысып, соққының жойқын болуынан екі автокөліктің де тізгінінде болған жүргізушілер мен ішіндегі үш жолаушы алған ауыр дене жарақаттарынан сол жерде жан тапсырды. Бұдан бөлек, дәл осы жол-көлік оқиғасы кезінде аман қалған тағы екі жолаушы денесінің түрлі бөліктерінен зақым алып, ауыр халде жергілікті медициналық мекемеге шұғыл түрде жеткізілді. Қазіргі уақытта дәрігерлер зардап шеккен азаматтарға қажетті медициналық көмек көрсетуде.
Жетісу облыстық Полиция департаментінің өкілдері болған қайғылы жағдайға байланысты келесідей ресми ақпарат жариялады:
«26 маусым күні кешкі уақытта Алматы – Өскемен автожолының 432-шақырымында екі автокөліктің қатысуымен жол-көлік оқиғасы орын алды. Апат салдарынан оқиға орнында қос жүргізуші мен үш жолаушы көз жұмды. Тағы екі жолаушы түрлі дене жарақаттарымен медициналық мекемеге жеткізілді».
