Маңғыстау облысының құқық қорғау органдары жергілікті тұрғындардың бұрынғы таныстары тарапынан жасалған заңсыз әрекеттерге қатысты шағымдары негізінде сталкинг деректері бойынша екі қылмыстық істі тергеуге кірісті, деп хабарлайды Alash.kz.
Ресми мәліметтерге сәйкес, екі жағдайда да жәбірленушілер өздерінің қауіпсіздігіне қатер төніп тұрғанын алға тартқан.
Бірінші жағдай бойынша зардап шегуші полиция бөліміне ағымдағы жылдың 13 қаңтарында арызданған. Әйел адамның айтуынша, бұрынғы танысы қарым-қатынас үзілгеніне қарамастан, оны жайына қалдырудан бас тартып, жүйелі түрде соңынан еріп, ізіне түсуді жалғастырған. Бұған дейін аталған ер адам тиісті жауапкершілікке тартылғанымен, заңсыз әрекеттерін тоқтатпаған. Осыған байланысты қазіргі уақытта ізіне түсу фактісі бойынша сотқа дейінгі тергеу амалдары жүргізіліп жатыр.
Екінші дерек 2024 жылдан бері жалғасып келген, алайда ресми арыз ағымдағы жылдың 3 ақпанында тіркелген. Зардап шегушінің мәлімдеуінше, оның бұрынғы танысы белгісіз телефон нөмірлерінен үздіксіз қоңырау шалып, тұрғылықты мекенжайы мен жұмыс орнының алдында аңдуды әдетке айналдырған. Тіпті ресми түрде шығарылған қорғау нұсқамасының талаптары да күдіктінің әрекетіне тосқауыл бола алмаған. Қазіргі таңда бұл азамат ұсталып, Ақтау қалалық уақытша ұстау изоляторына қамауға алынды.
Полиция қызметкерлері екі оқиғаның да барлық егжей-тегжейін анықтау үшін кешенді тергеу шараларын жүзеге асыруда. Тергеу барысы құзырлы органдардың қатаң бақылауына алынған.
