Сауда және интеграция министрі Арман Шаққалиев Жаңа жылдық дастарханның басты тағамы – отбасында асылған ет екенін хабарлады. Оның айтуынша, мерекелік кешкі асқа жұмсалатын шығын шамамен 100–120 мың теңге құрайды, деп жазады Alash.kz Stan.kz порталына сілтеп.
«Басты тағам – асылған ет. Ақшаны әйелім жұмсайды. Мен Сауда министрі ретінде базарға жиі барып саудаласамын, бұл қалыпты жағдай», – деді министр Мәжіліс кулуарында.
Журналистер министрден сатушыларға жеңілдік жасай ма деп сұрады. Арман Шаққалиев:
«Әрине. Аздап жеңілдіктер бар, азы 5 мың теңгеден, көп болса 10 мың теңгеден жасалады. Барлығы тауар сапасына байланысты. Бірақ тұрақты клиент ретінде кей жерде есептелген соманы дөңгелектеп, азайтып береді», – деді.
Министрдің айтуынша, ведомствоның есептеуіне сәйкес, қазақстандықтар Жаңа жылдық дастарханға орташа есеппен 73 мың теңге жұмсайды. Ал оның отбасында шығын сәл жоғары – 100–120 мың теңге.
