Абай облысындағы Орлов шахтасында орын алған апаттан кейін құтқарылған 40 жастағы жұмысшының денсаулық жағдайына қатысты соңғы мәліметтер жарияланды, деп жазады Alash.kz.
Төрт сағатқа жуық үйінді астында жатқан кенші қазіргі таңда Семей қаласындағы ауруханада мамандардың қатаң бақылауында жатыр. Дәрігерлер науқастың алған жарақаттарының күрделілігіне байланысты арнайы консилиум өткізуді жоспарлап отыр.
Оқиға 27 сәуір күні таңғы уақытта «KAZ Minerals» кәсіпорнына қарасты өндіріс орнында болған. Тау жыныстарының опырылуы салдарынан үйінді астында қалған ер адамды құтқару операциясы бірнеше сағатқа созылды. Зардап шегушіге алғашқы медициналық көмек аудандық ауруханада көрсетілгенімен, жағдайының күрделенуіне байланысты ол шұғыл түрде облыс орталығына тасымалданды.
Медициналық тексеру қорытындысы бойынша науқасқа бірнеше ауыр диагноз қойылды. Дәрігерлер бас-ми жарақаты мен ішкі мүшелердің, соның ішінде бүйректің зақымдалғанын анықтады. Сонымен қатар дене мүшелерінің ұзақ уақыт қысылып қалуы салдарынан туындайтын синдром және травматикалық шоқ тіркелген. Кеншінің денесінде көптеген сыртқы жарақаттар мен соққы іздері де бар.
Қазіргі уақытта мамандар науқастың жағдайын тұрақтандыру үшін барлық қажетті шараларды жасап жатыр. Алдағы уақытта өтетін дәрігерлер консилиумы емдеу тактикасын нақтылап, одан арғы оңалту шараларын белгілейтін болады. Кәсіпорын басшылығы мен құзырлы органдар оқиғаның мән-жайын зерттеуді жалғастыруда.
