Оралда жасөспірімді құтқармақ болған 18 жастағы бойжеткен суға батып қаза тапты, деп жазды Alash.kz.
Орал қаласында суға батып бара жатқан жасөспірімді құтқаруға ұмтылған 18 жастағы Алсу Ермағамбетова көз жұмды.
Қайғылы оқиға 16 шілде күні Орал өзенінің Ремзавод ауданындағы суға түсуге арналмаған жерде болған. Алдын ала мәлімет бойынша, жүзе алмайтын бойжеткен көмек сұрап жатқан жасөспірімді құтқару үшін өзенге секірген.
Марқұмның әпкесі Айгүл Хусаинованың айтуынша, сол күні Алсу құрбысымен және екі танысымен бірге өзен жағасында демалып жүрген. Олар бойжеткеннің медициналық колледжге оқуға түскенін атап өткен.
Оқиға кезінде Алсу мен құрбысы таяз суда жүрген, ал 16 жастағы жасөспірім өзеннің терең жағына қарай жүзіп кеткен. Біраз уақыттан кейін ол көмек сұрай бастаған.
«Алғашында бәрі мұны әзіл деп ойлаған. Кейін оның шынымен батып бара жатқанын түсінгенде, жүзе алмайтын Алсу бірден суға секірді. Жасөспірім өз күшімен жағаға шығып үлгерді, оған көмекке ер адам да жеткен. Ал Алсуды құтқару мүмкін болмады», – деді марқұмның әпкесі.
Туыстарының мәліметінше, Алсудың құрбысы оның суға кетер алдындағы жоғары көтерілген қолын ғана көрген. Құтқарушылар оқиға орнына шамамен 40 минуттан кейін келіп, бойжеткеннің денесін ағыс бойымен 40 метр төменнен тапқан. Дәрігерлер оның қайтыс болғанын тіркеді.
Айгүл Хусаинованың сөзінше, Алсу Батыс Қазақстан облысы Теректі ауданының Теректі ауылында өсіп, әжесінің тәрбиесінде болған. Мектепте жақсы оқып, спортпен айналысқан. Биыл медициналық колледжге түсіп, дәрігер атанып, әжесін емдеуді армандаған.
18 жастағы бойжеткенмен қоштасу рәсімі 20 шілдеде өтті.
