«Қазақмыс» Тобының құрылымына кіретін Балқаш мыс балқыту зауытының (БМЗ) күкірт қышқылы цехында күрделі жөндеу жалғасуда. Шара шеңберінде 18 жылдан астам уақыт жұмыс істеген жылу алмастырғышты ауыстыру жобасы іске асырылуда, деп жазады Alash.kz.
Бұл - жұмыс компанияның өндірістік қуатын жаңғырту бағдарламасының бір бөлігі саналады.
Жылу алмастырғыш технологиялық үдерісте маңызды рөл атқарады, ол күкіртті ангидридті (SO₂) күкірт ангидридіне (SO₃) тотықтыру кезінде қажетті жылу балансын қамтамасыз етеді. Оның тұрақты жұмысы бүкіл өндірістік циклдың тұрақтылығына тікелей әсер етеді.
Қазіргі уақытта қабықшалы-түтікшелі салқындатып қайта қыздыруға арналған жаңа жылу алмастырғышты монтаждау жұмысы жүргізілуде. Жабдық цехтың контакт бөлімінде SO₂ газын қыздыруға және бір мезгілде SO₃ газын салқындатуға арналған.
Жылу алмастырғыштың құрылымы жеті сегментке бөлінген құбырлы шоғырдан тұрады. Бұл монтаждау үдерісін оңтайландыруға мүмкіндік береді. Жабдықтың жалпы салмағы шамамен 200 тоннаны құрайды, ал биіктігі 25 метрге жетеді.
Жабдық «Қазақмыс» корпорациясы құрылымына кіретін Қарағанды құю-машина жасау зауытында коррозияға төзімді материалдан жасалған, бұл оның агрессивті ортада сенімді жұмыс істеуін қамтамасыз етеді.
Жұмысты техникалық қызмет көрсету және жөндеу қызметінің мамандары жөндеу уақытын қысқарту жобасы шеңберінде атқаруда. Монтаждау жұмысын мерзімінен бұрын аяқтау жоспарланған.
Заманауи жабдыққа көшу агрегаттардың сенімділігін арттыруға, жоспардан тыс тоқтап қалу қаупін азайтуға және өндірістік циклдің тиімділігін жақсартуға мүмкіндік береді.
