Қырғызстан астанасында кәмпит ішіне өткір заттар салып, жасөспірімдерге таратқан ер адам ұсталды, деп жазады Alash.kz.
Полиция қызметкерлерінің мәліметінше, бұл оқиға туралы ақпарат құқық қорғау органдарына жергілікті тұрғындардан түскен. Қазіргі таңда аталған факті бойынша тергеу амалдары жүргізіліп, күдіктінің әрекетіне құқықтық баға берілуде.
Бішкектің Ақ-Ордо елді мекенінің тұрғыны өз шағымында белгісіз тұлғаның балаларға, соның ішінде оның 2015 жылы туған қызына кәмпит ұсынғанын айтқан. Кейінірек балалар тәттіні ашқан кезде оның ішінен ине сынықтары мен фрагменттерін тапқан. Бұл жағдай ата-аналар арасында үрей туғызып, шұғыл түрде полицияға хабарласуға себеп болған.
Тәртіп сақшылары жедел іздестіру шараларын жүргізу барысында күдіктіні анықтап, қамауға алды. Қазіргі уақытта зардап шеккендердің нақты саны мен ер адамның мұндай қадамға бару себептері анықталып жатыр.
