Қытайлық ерлі-зайыптылар 33 жыл бойы өліге санаған ұлымен кездесті,деп хабарлайды Alash.kz ұлттық порталы Қазақпарат агенттігіне сілтеме жасап.
South China Morning Post басылымының жазуынша, Қытайда ұлдары туғаннан кейін көп ұзамай қайтыс болды деп сенген ерлі-зайыптылар оның шын мәнінде тірі және жағдайы жақсы екенін 30 жылдан астам уақыт өткен соң білді.
Қытайдың шығысындағы Аньхой провинциясындағы кедей кентте өскен 33 жастағы Чжан Хуайюань өзін асырап алғанын естігенде қатты таң қалды. Ол өзінің биологиялық ата-анасы Қытайдың оңтүстік-шығысындағы Чжэцзян провинциясының бай саудагерлері екенін білді. Ол биологиялық ата-анасынан 400 шақырымдай жерде өскен.
Босанғаннан кейін дәрігерлер Чжанның биологиялық ата-анасына оның шала туылғандықтан шетінеп кеткенін айтты. Бірақ, шын мәнінде нәресте аурухана директорының жүкті бола алмаған туысқанына берілген. Асырап алушылардың жасы 50-ден асқан. Оның әкесі мүгедек болды, сондықтан Чжан қаржыдан қысылып, 17 жасында мектепті тастап кетуге мәжбүр болды. Әкесі 2023 жылы қайтыс болғаннан кейін ғана асырап алған ана ұлына оның өз баласы емес екенін айтқан.
Чжан шын ата-анасымен осы жылдың мамыр айында полицияның көмегімен кездесті. Ли отбасы Қытайдың шығысындағы Тяньцзинь қаласындағы Чжанның үйіне барып, келіні мен тоғыз жасар немересін көрді.
20 мамырда Чжэцзянда өткен үлкен мерекеде Чжанның биологиялық әкесі Ли Шицзе көзіне жас алып, баласына 1,2 млн юань (166 мың доллар) шот ашу үшін банк картасын сыйға тартты.
Чжан кедейлікте өскенімен биологиялық ата-анасының іскерлік дағдыларын мұра етті – оның шағын фабрикасы бар еді.
