Өскемен гарнизонындағы әскери бөлімдердің бірінде қарауыл қызметін атқару кезінде мерзімді әскери қызметші өзіне бекітілген қарудан өзіне-өзі оқ атты. Ол алған жарақатынан көз жұмды, деп жазады Alash.KZ.
Әскери қызметші былтыр сәуірде мерзімді әскери қызметке шақырылған.
"Аталған факт бойынша қылмыстық іс қозғалды. Сотқа дейінгі тергеп-тексеру барысы Өскемен гарнизонының әскери прокуратурасының бақылауында. Оқиғаның себептері мен мән-жайы анықталуда", - делінген хабарламада.
Оқиға орнында Қорғаныс министрінің орынбасары генерал-майор Асқар Мұстабековтің жетекшілігімен комиссия жұмыс істеп жатыр.
Қорғаныс министрлігі мен Қарулы Күштерінің басшылығы марқұмның туған-туыстары мен жақындарына көңіл айтады. Отбасына барлық қажетті көмек көрсетіледі.
Бұған дейін, 6 қаңтарда Шымкенттегі ауруханада мерзімді әскери қызметтегі сарбаз көз жұмған еді. Оның жүрегі кенеттен тоқтаған.
