Жамбыл облысында әскери қызметшінің қазасына байланысты сотқа дейінгі тергеп-тексеру амалдары басталды, деп хабарлайды Alash.kz.
Қайғылы оқиға 27 қаңтар күні қаруды ұстау кезінде орын алған ауыр жарақаттан болған. Ішкі істер министрлігінің әскери-тергеу органдары істі өз бақылауына алды.
Қазіргі уақытта жағдайды жан-жақты зерттеу үшін арнайы жедел-тергеу тобы құрылды. Оқиғаның мән-жайын анықтау мақсатында Қорғаныс министрінің орынбасары, Бас әскери прокурор және ІІМ Әскери-тергеу департаментінің басшысы оқиға орнына барып, тексеру жүргізуде. Тергеу барысын Бас Прокурор жеке бақылауында ұстап отыр.
Бас прокуратура таратқан ресми хабарламада: «Әскери қызметшілердің өмірі мен денсаулығын сақтау, мерзімді қызметті өткеру қауіпсіздігі мәселелері жақын арада Бас прокуратураның арнайы Алқа мәжілісінде қаралатын болады», - деп көрсетілген.
Сонымен қатар, еліміздегі барлық әскери бөлімдерде тәртіп пен қауіпсіздік талаптарының сақталуына қатысты жаппай тексеру жүргізу тапсырылды.
