АҚШ Венесуэлаға қатысты жаңа жасырын операциялар бастау мүмкіндігін қарастыруда, деп хабарлайды Alash.kz.
Reuters агенттігінің хабарлауынша, Вашингтон Венесуэлаға бағытталған қысымды күшейтіп, жаңа операциялар кезеңін бастау жоспарын талқылап жатыр. Аноним дереккөздер бұл шаралар президент Николас Мадуроны биліктен тайдыру әрекетіне дейін ұласуы мүмкін екенін айтады.
Агенттік мәлім еткен ақпаратта:
«АҚШ Венесуэлаға қатысты операциялардың жаңа кезеңін алдағы күндері бастауға дайындалып жатыр», – делінген.
АҚШ-тың жоспарында жасырын операцияларды қолдану мүмкіндігі де бар.
Шенеуніктердің бірі былай деген:
«АҚШ президенті Дональд Трамп біздің елге есірткі жеткізуге жол бермеу және оған кінәлілерді жауапқа тарту үшін американ билігінің барлық мүмкіндігін пайдалануға дайын».
Алайда операциялардың нақты көлемі мен мерзімі белгісіз. Трамптың бұл бағыттағы түпкілікті шешімі қабылданғаны да ресми түрде расталмаған.
Соңғы екі айда АҚШ әскері Кариб теңізінде бірқатар операциялар жүргізіп, есірткі тасымалдаған деп есептелген қайықтарды жойған. Вашингтон бұл әрекеттерді трансұлттық қылмыс пен заңсыз заттар айналымына қарсы шаралар деп түсіндіреді.
Осы қадамдар аясында Каракас пен Вашингтон арасындағы қатынастар айтарлықтай ушығып отыр. Америкалық тарап ЦРУ-ға Венесуэлада жасырын операциялар жүргізуге рұқсат берген. АҚШ Мадуроны есірткі тасымалы үшін террористік ұйымдармен байланыс орнатты деп айыптайды.
Қалған жағдайды күрделендірген тағы бір фактор – өткен аптада Кариб теңізіне АҚШ әскери-теңіз күштерінің USS Gerald R. Ford авианосецімен бірге соққы беру тобының кіруі. Кемеде төрт мыңға жуық әскери қызметкер мен бірнеше тактикалық ұшақ бар.
