АҚШ президенті Дональд Трамп Таяу Шығыстағы жағдайға байланысты кезекті шешімдерін жария етті, деп жазады Alash.kz.
Америка көшбасшысы Израильдің Ливан аумағына жасайтын әуе шабуылдарына ресми түрде тыйым салатынын мәлімдеп, соғыс қимылдарын тоқтатуды талап етті. Сонымен қатар, ол Иранға қатысты теңіз блокадасының екі ел арасында түпкілікті келісім орнатылғанға дейін жалғаса беретінін нақтылады.
Израиль мен Ливан арасындағы қарулы қақтығысты тоқтату мақсатында Трамп қатаң ескерту жасады. Ол АҚШ-тың бұл мәселедегі ұстанымы бұдан былай өзгермейтінін және әскери операцияларды дереу доғару қажеттігін атап өтті. Бұл қадам аймақтағы шиеленісті бәсеңдетуге бағытталған маңызды саяси шешім ретінде бағалануда.
Америка президенті бұл шешімін әлеуметтік желідегі парақшасында былай деп бекітті:
«Израиль бұдан былай Ливанды бомбаламайды. АҚШ бұған ТЫЙЫМ САЛАДЫ. Жетер енді!»
Бұдан бөлек, АҚШ әкімшілігі Иранға қатысты қысымды бәсеңдетпеуге ниетті. Ормуз бұғазы арқылы кеме қатынасының ашылғанына қарамастан, теңіз блокадасы келіссөздердің соңғы нәтижесіне дейін өз күшінде қала бермек. Трамптың айтуынша, қазіргі уақытта тараптар көптеген мәселелер бойынша мәмілеге жақын тұр, сондықтан бұл процесс ұзаққа созылмауы тиіс.
Иранмен арадағы қарым-қатынасқа қатысты АҚШ президенті мынадай пікір білдірді:
«Иранның теңіз блокадасы біз келісімге келгенге дейін күшінде қалады. Бұл процесс өте жылдам өтуі тиіс, өйткені көптеген тармақтар бойынша келісімге қол жеткізілді».
