АҚШ Ирандағы әскери нысандарға қайтадан соққы жасады, ал Иран Ормуз бұғазын жауып тастады

АҚШ әскері Иранның оңтүстігіндегі бірқатар стратегиялық нысанға шабуыл жасады. Операция АҚШ президенті Дональд Трамптың бұйрығымен жүргізілгені хабарланды, деп жазады Alash.KZ.

Мәліметтерге сәйкес, америкалық күштер әуе қорғанысы жүйелерін, радиолокациялық станцияларды және ұшқышсыз ұшу аппараттарын басқару орталықтарын нысанаға алған. Шабуыл барысында 49 Tomahawk қанатты зымыраны қолданылған. Жарылыстар Иранның бірнеше өңірінде тіркелген.

АҚШ Орталық қолбасшылығы (CENTCOM) операция аяқталғаннан кейін барлық белгіленген нысандар жойылғанын мәлімдеді.

Бұған жауап ретінде Иран Бахрейн мен Кувейт аумағындағы америкалық әскери базаларға соққы жасады. Ирандық ақпарат құралдарының хабарлауынша, Әл-Салем, Ахмад әл-Жабер және Шейх-Иса әскери әуе базалары шабуылға ұшыраған.

Сондай-ақ Тегеран Ормуз бұғазын жабу туралы шешім қабылдағаны хабарланды. Бұл әлемдік мұнай тасымалына әсер етуі мүмкін маңызды қадам ретінде бағаланып отыр.