Қостанай облысының Жітіқара қаласында болған адам өліміне қатысты қылмыстық іс бойынша сот үкімі шықты. Анасын қорғауға тырысқан 15 жастағы жасөспірімнің өліміне себеп болған оның өгей әкесі 23 жылға бас бостандығынан айырылды, деп жазады Alash.KZ
Оқиға биыл сәуір айында болған. Отбасында дастарқан басында ішімдік ішілгеннен кейін ер адам мен әйелі арасында жанжал туындаған. Кикілжің кезінде ол әйеліне пышақпен шабуыл жасаған. Сол сәтте анасына араша түспек болған жасөспірім ауыр жарақат алып, көз жұмған.
Әйелдің өзі де бірнеше жерінен жараланған. Алайда ер адамның әрекетін оның туысы тоқтатқан. Осылайша, жасөспірімнің анасы аман қалған.
Сот барысында айыпталушының ақыл-есі дұрыс екені анықталған. Ол өз кінәсін мойындап, жасаған әрекетіне өкініш білдіріп, кешірім сұраған.
Прокурор сотталушыға 22 жыл бас бостандығынан айыру жазасын сұраса, қаза тапқан баланың туыстары оған өмір бойына бас бостандығынан айыру жазасын тағайындауды талап еткен.
Сот шешімімен ер адам адам өлтіруге оқталғаны және адам өлтіргені үшін кінәлі деп танылып, орташа қауіпсіздік мекемесінде 23 жылға бас бостандығынан айырылды.
Сонымен қатар сот моральдық зиянды өтеу туралы талапты ішінара қанағаттандырды. Сотталушы қаза болған жасөспірімнің анасына 15 миллион теңге, әкесіне 5 миллион теңге өтемақы төлеуге міндеттелді.
Бұл іс бойынша сот шешімі қылмыстың салдарын ғана емес, отбасындағы жанжалдың қайғылы жағдайға әкелгенін де көрсетті.
