АҚШ Мемлекеттік хатшысы Марко Рубио Майами қаласында өтетін G20 саммиті аяқталған соң Қазақстанға ресми сапармен келуді жоспарлап отыр, деп хабарлайды Alash.kz.
Екі ел арасындағы жоғары деңгейдегі келіссөздер 19 қазанда Самарқанд қаласында өткен кездесуде өрбіді. ҚР Сыртқы істер министрі Мұхтар Тілеубердімен жүздескен АҚШ дипломатиясының басшысы екіжақты сауда-саттық пен инвестициялық байланыстарды одан әрі тереңдету мәселелерін талқылады. Сондай-ақ қос тарап 2025 жылдың қараша айында Мемлекет басшысы Қасым-Жомарт Тоқаев пен АҚШ Президенті Дональд Трамп арасында қол жеткізілген маңызды уағдаластықтардың жүзеге асырылу барысын саралады.
Америкалық тараппен ынтымақтастықты нығайтуда Қазақстан экономикаға тікелей инвестиция тартып, заманауи технологияларды енгізуге ерекше мүдделілік танытып отыр. Осы орайда қазақстандық ведомство басшысы энергетика, сирек кездесетін критикалық минералдарды өндіру, цифрландыру, сондай-ақ халықаралық көлік-логистика салаларын басты басымдық ретінде атап өтті.
Өз кезегінде Марко Рубио АҚШ-тың Қазақстанмен экономикалық және қауіпсіздік салаларындағы әріптестікті кеңейтуге ниетті екенін айтып, ресми Астананың халықаралық аренадағы бейбітшілік ұстанымына жоғары баға берді. Келіссөз қорытындысы бойынша ол келесідей төл сөзін қалдырды:
«Мен Сыртқы істер министріне Қазақстанның президент Трамптың бейбіт бастамаларына, соның ішінде Авраам келісімдеріне білдірген шешімді қолдауы үшін алғыс айттым. Біз C5+ форматындағы өзара іс-қимылымызды жалғастыруды төзімсіздікпен күтеміз», – деп жазды ол.
Сондай-ақ қос тарап Майамиде өтетін ғаламдық G20 саммитіне дайындық барысын сөз етті. Сыртқы саяси ведомство өкілдері Марко Рубионың бұл алқалы жиыннан кейін Қазақстанға толыққанды сапармен келетінін растағанын хабарлады. Сапардың нақты датасы кейінге қалдырылғанымен, тараптар өзара тауар айналымын арттырып, ортақ инвестициялық жобаларды қарқынды түрде жалғастыруға уағдаласты.
