Алматы соты белсенді Санжар Боқаевқа қатысты екі ай мерзімге қамау түріндегі бұлтартпау шарасын санкциялады, деп жазды Alash.kz.
Бұл туралы адвокат Диас Ахметовке сілтеме жасаған журналист Вадим Борейко хабарлады. Мәліметке сәйкес, 19 наурыз күні Алматының тергеу соты осындай шешім қабылдаған.
Адвокаттың айтуынша, Боқаев Ұлттық қауіпсіздік комитетінің Алматыдағы тергеу изоляторында қамауда болады.
Еске сала кетейік, белсенді 18 наурыз күні ұсталған.
Бас прокуратураның дерегінше, ол табысы төмен азаматтарға ақша ұсынып, ағаш кесу мен ұрлық әрекеттерін ұйымдастыруға тапсырма берген деген күдікке ілінген.
Сонымен қатар, прокуратура Боқаевты аса ірі көлемде алаяқтық жасады, жалған ақпарат таратты және қоғамда теріс пікір қалыптастыру мақсатында бейнематериалдар жариялады деп айыптап отыр.
Бұған дейін Санжар Боқаев Алматыдағы өзекті мәселелерді жиі көтеріп жүрген. Кейін қоғамдық белсенділіктен шаршағанын айтып, АҚШ-қа көшкенін мәлімдеген еді.
