Алматыда автобус жолағы пайда болды: жолаушылар кептеліске шыдамай, жол үстінде төбелесуде (ВИДЕО)

Алматы тұрғындары таңертеңнен бастап Саин көшесіндегі жағдайды әлеуметтік желілерде бөлісіп жатыр. Жаңа автобус жолағы іске қосылғаннан кейін аталған көшеде көлік кептелісі күшейген, соның салдарынан жолаушылар жолға таласып, жаға жыртысып жатыр деп жазады Alash.KZ.

Бейнежазбалардан ұзын-сонар кептелістерді, қозғалыстың баяулағанын, тіпті жүргізушілер арасында жанжалдардың болғанын көруге болады. Қала тұрғындарының айтуынша, жолдағы қозғалыс айтарлықтай қиындап, межелі жерге жету уақыты керісінше ұзарған.

Еске салайық, 20 маусымнан бастап Рысқұлов даңғылынан Мұстафин көшесіне дейінгі аралықта қоғамдық көліктерге арналған арнайы жолақ пилоттық режимде іске қосылды. Қала әкімдігі бұл бастама автобустардың жылдам әрі тұрақты қозғалуына мүмкіндік береді деп есептейді.

Алайда көптеген алматылықтар арнайы жолақ іске қосылмай тұрып-ақ мұндай өзгерістің қаладағы ең жүктемесі жоғары көшелердің біріндегі жағдайды одан әрі қиындатуы мүмкін екенін айтып, алаңдаушылық білдірген еді.