Дүйсен Қасейінов - қазақтан шыққан әлемдік аренадағы ең танымал мәдениет саласының менеджері екені анық. Дәстүрлі музыка және би бойынша халықаралық ұйымының (ISTMD) Халықаралық Кеңесі оның осы еңбегін ескеріп Халықаралық ұйымның Елшісі етіп сайланды, деп хабарлайды Alash.kz.
Бұл туралы Асқар Тұрғанбай әлеуметтік желісіндегі парақшасында сүйіншіледі.
2025 жылғы 11 қаңтарда Жаңа Зеландияның Веллингтон қаласында өткен Халықаралық дәстүрлі музыка мен би кеңесінің (ICTMD) 47-ші Дүниежүзілік конференциясы аясындағы Бас ассамблея отырысында ұйымның басшылығы мен Атқарушы кеңесінің сайлауы өтті. Конференцияға қатысқан 70 ел өкілдерінің ерекше назарын Атқарушы кеңестің ұйым құрылымына «ICTMD елшісі» мәртебесін енгізу туралы тарихи шешімі аударды. Бұл мәртебе мәдениет пен өнер қайраткерлеріне беріледі, олар Кеңестің мақсаттарын ілгерілетуге, мәдени мұраны сақтауға және дәріптеуге зор үлес қосып, ICTMD-тің халықаралық аренадағы даму жоспарларын ұсынуда белсенділік танытып келеді.
ICTMD президенті, Словения өкілі Сванибор Петтан үміткерлерді таныстыра отырып, былай деді: «Д. Қасейінов басшылығымен ТҮРКСОЙ ICTMD-тің стратегиялық серіктесіне айналып, бірқатар маңызды іс-шараларды өткізуге қолдау көрсетті: ICTMD-тің 43-ші Дүниежүзілік конференциясы (2015 ж., Астана); ISME-нің 33-ші Дүниежүзілік конференциясы (2018 ж., Баку), дәстүрлі музыкаға арналған халықаралық конференциялар, симпозиумдар және фестивальдер. Д. Қасейіновтің халықаралық мәдени ынтымақтастықты дамытуға бағытталған көпжылдық жан-жақты қызметі, ғылыми жобаларды қолдауы, түркі халықтарының мәдени мұрасын сақтау мен оны әлемдік мәдени кеңістікте насихаттаудағы еңбегі ICTMD мақсаттары мен миссиясын ілгерілетуге зор үлес қосты».
Д. Қасейіновтің кандидатурасы Атқарушы кеңес пен конференция қатысушылары тарапынан бірауыздан қолдау тапты. Оның ICTMD елшісі лауазымына сайлануы Қазақстан мен ТҮРКСОЙ-ға мүше басқа елдердің мәдениет пен өнер саласындағы халықаралық ынтымақтастықты дамытудағы маңызды рөлін айқын көрсетеді.
