Алатау құрылысы үшін қытайлық компанияға 1,4 млрд теңге төленеді

Алатау қаласында салынып жатқан жобаларға шетелдік компаниялар да тартылып жатыр. Alatau City Iconic Complex компаниясы Gate District іскерлік ауданын дамыту және Iconic Complex мұнарасын салу аясында шетелдік компаниялармен құны 1,4 млрд теңгеден асатын келісімдер жасаған, деп жазады Alash.KZ

Ең ірі келісім қытайлық CSCEC International Construction Corporation компаниясымен жасалған. Gate District құрылысы мен дамуына қатысты консультациялық қызмет үшін компанияға 2,89 млн доллар, яғни шамамен 1,37 млрд теңге төленеді.

Сонымен қатар жобаға британдық сәулет бюросы Zaha Hadid Architects пен италиялық MIC-HUB тартылған. Біріншісі бірегей ғимараттар мен бизнес-парктің тұжырымдамалық дизайнын әзірлесе, екіншісі көлік және мобильділік мәселелері бойынша кеңес береді.

Бұдан бөлек, Caspian Group компанияларының бірі Қазақстан үкіметтік делегациясының Оңтүстік Кореяға сапарына 40,4 млн теңге жұмсаған. Сапардың мақсаты – жаңа қалалар салу тәжірибесін және смарт-сити жүйелерін енгізу мүмкіндіктерін зерделеу.