Атыраудағы қанды оқиға бойынша өтіп жатқан сот отырысында куәгерлерден жауап алу кезеңі басталды. Кезекті процесте сот залына айыпталушының әкесі шақырылған сәтте сотталушы орындығында отырған Сұлтан Сәрсемәлиев жылап жіберді, деп хабарлайды Alash.kz.
Отырыс барысында куәлік еткен қария ұлының бұрын-соңды мінезі ауыр немесе жанжалқой болмағанын айтқанымен, оның жасаған бұл ауыр қылмысын ақтаудан мүлдем аулақ екенін және заң аясында әділ шешім қабылдануын қалайтынын жеткізді, деп хабарлайды оқиға орнындағы БАҚ өкілдері.
Сот залында жауап берген қария өз сөзінде ұлы Сұлтанның зиянды әдеттерден аулақ, өмірде өте сабырлы және өз шаңырағына барынша қамқорлық танытып келген азамат болғанын алға тартты. Ол бұл отбасында осындай орны толмас үлкен қасірет орнайды деп ешқашан ойламағанын және жан түршігерлік оқиға туралы арада біршама уақыт өткенде ғана естігенін мәлімдеді.
Сонымен қатар, куәгер отбасының аяусыз өлтірілуінен кейін қараусыз қалған немерелерінің тағдырына тоқталды. Трагедиядан соң кәмелетке толмаған балалар мемлекеттік қамқорлыққа алынып, түрлі балалар мекемелеріне орналастырылған. Қария қазіргі уақытта арнайы орындарда тәрбиеленіп жатқан сол немерелеріне жиі барып, олардың жағдайын біліп тұратынын айтты.
Қазіргі таңда төрт бірдей адамның өмірін қиған бұл шулы іс бойынша сот тергеуі өте мұқият жүргізіліп жатыр. Алдағы сот отырыстарында осы қылмысқа қатысты тағы да бірнеше куәгерден ресми түрде жауап алу жоспарланған.
