Қостанай облысында ер адам әйелі мен оның өгей ұлына пышақпен шабуыл жасады, деп жазады Alash.kz..
Қанды оқиға салдарынан 15 жастағы жасөспірім алған жарақаттарынан оқиға орнында тіл тартпай кетті. Ал түрлі жарақат алған әйелге медициналық көмек көрсетілуде. Қазіргі уақытта күдікті құрықталып, тергеу изоляторына қамалды.
Қайғылы оқиға 25 сәуір күні Жітіқара қаласындағы пәтерлердің бірінде орын алған. Тұрмыстық негізде туындаған келіспеушілік барысында үй иесі суық қару қолданып, отбасы мүшелеріне ауыр соққы берген. Тергеу барысында анықталғандай, шабуылдаушы әйелдің ресми жұбайы болғанымен, қаза тапқан баланың туған әкесі емес. Жасөспірім әйелдің бірінші некесінен туған ұлы екені белгілі болды.
Құқық қорғау органдары қылмыс жасады деген күдіктіні ізі суымай қолға түсірді. Ол бірден уақытша ұстау изоляторына жеткізілді. Полиция департаменті бұл деректі растап, оқиғаның мән-жайын анықтау үшін кешенді сараптамалар тағайындалғанын мәлімдеді. Күдіктінің бұрын қылмыстық жауапкершілікке тартылған-тартылмағаны да тексеріліп жатыр.
Аталған факті бойынша Қылмыстық кодекстің адам өлтіру және адам өлтіруге оқталу баптары бойынша іс қозғалды. Тергеу амалдары жалғасуда, істің барысы облыстық полиция департаменті басшылығының бақылауына алынды.
