Қостанай облысында 5 жасар бала қайтыс болды, деп хабарлайды Alash.kz.
Оқиға 26 қазанда тіркелген. Алдын ала мәлімет бойынша, бала басы мен денесіне түскен ауыр жарақаттардың салдарынан көз жұмған. Күдікті оқиға күні ұсталып, сот оны қамауға алу туралы санкция берді.
Жергілікті тұрғындардың айтуынша, оқиғаға баланың әкесінің қатысы болуы мүмкін. Алайда бұл ақпаратқа ресми растау берілген жоқ.
Баланың анасы ата-аналық құқығынан айырылған. Бүлдіршін бұған дейін әжесінің қарауында тұрып келген, ал наурыз айынан бастап әкесінің қамқорлығына өткен.
Бала құқықтары жөніндегі уәкіл Несібелі Бәсенова баланың орналасу тәртібіне қатысты мынадай төл сөзін келтірді:
«2025 жылғы 28 наурыздағы сот шешіміне сәйкес, бала әкесімен бірге тұруы тиіс болған. Әжесі баланы бергісі келмегенімен, әкесі жалдаған адвокаттың араласуынан кейін кәмелетке толмаған бала оның қолына көшкен».
Қазіргі уақытта полиция бала өлімі фактісі бойынша сотқа дейінгі тергеу жүргізіп жатыр.
