АҚШ Президенті Дональд Трамп америкалық БАҚ беттерінде жарияланған Иранмен жасалатын келісім жоспарына қатысты мәлімдеме жасады, деп жазады Alash.kz.
Ақ үй басшысының айтуынша, New York Times басылымы мен CNN телеарнасы таратқан он тармақтан тұратын құжат шындыққа жанаспайды. Президент бұл әрекетті келіссөздер үдерісіне қатысып жатқан тұлғалардың беделіне нұқсан келтіруге бағытталған қадам деп бағалады.
Трамп өзінің әлеуметтік желідегі парақшасында жарияланған мәліметтердің негізсіз екенін қадап айтты. Ол бұл ақпараттық науқанды келіссөздер барысын қиындату үшін жасалған әдейі манипуляция ретінде қарастырады. Президенттің пікірінше, жалған ақпарат таратумен айналысатын ақпарат құралдары мемлекеттік маңызы бар мәселелерді бұрмалап көрсетуде.
Осы мәселеге қатысты АҚШ басшысы былай деп мәлімдеді:
«New York Times газеті мен фейк таратушы CNN арнасы Иранмен келіссөздегі он тармақтан тұратын фейк жоспарды таратып, келіссөзшілердің абыройын түсірмек болды. Барлық он тармақ ойдан шығарылған».
