Енді сахнада аузын жыбырлатып, халықты алдап жүрген өтірік әншілердің дәурені бітті. Бұдан былай фонограммамен ән айтқандар миллиондаған айыппұл арқалайды, деп жазады Alash.KZ
Жанды дауыста ән айта алмайтын, халықтың ақшасын жеп, сахнаны қорлап жүрген «жұлдыздарға» қарсы нағыз соғыс басталды!
Осы жылдың 19 маусымында Президент Қасым-Жомарт Тоқаев өнер әлемін сілкіндірген тарихи құжатқа — Қылмыстық және Әкімшілік кодекстерге өзгерістер енгізу туралы № 318-VIII заңға қол қойды. Бұл түзетулер сахнадағы жасандылықтың тамырына балта шаппақ! Жаңа заң ресми түрде күшіне енді.
Әкімшілік құқық бұзушылық туралы кодекстің 156-бабына енгізілген су жаңа тармақтар кез келген өтірік орындаушының зәресін ұшырары анық. Заң мәтінінде былай деп қатал ескертілген:
"Телевизиялық жазбаларды және концерттік ойын-сауық мәдени-бұқаралық іс-шараларды өткізуге арнайы бейімделмеген және арналмаған өзге де орындарды қоспағанда, концерттік ойын-сауық мәдени-бұқаралық іс-шараларды өткізу кезінде ұйымдастырушылардың, шығармашылық ұжымдар мен орындаушылардың дауыс (вокалды) фонограммаларын пайдалануы – жеке тұлғаларға – 100, заңды тұлғаларға 150 айлық есептік көрсеткіш мөлшерінде айыппұл салуға алып келеді"
Егер бұл масқаралық әкімшілік жаза қолданылғаннан кейін бір жыл ішінде тағы қайталанатын болса, жаза тіпті күшейеді Фонограммамен ұсталған жеке тұлғалар — 150 АЕК, ал заңды тұлғалар 200 АЕК мөлшерінде сұмдық айыппұл арқалап, тақырға отырмақ!
Алайда бұл қатал талап телевизиялық түсірілімдер мен жазбаларға, сондай-ақ концерт өткізуге арнайы жабдықталмаған орындарға қолданылмайды. Десек те, бұған дейін құзырлы органдар фонограммаға толықтай тыйым салудың мүмкін еместігін айтып, ақталған болатын. Бірақ бұл жолғы заң фонограммамен күнкөріс жасап жүргендердің нағыз сорына айналатыны анық!
