Мемлекеттік тұрғын үй кезегіне тұру талаптарын айналып өтпек болған азаматтардың бірі 400 пәтерден үлесі бар екеніне қарамастан, баспана кезегіне тіркелген. Бұл туралы «Отбасы банк» өкілі Азат Әшімов мәлімдеді, деп жазады Alash.kz.
Оның айтуынша, мемлекеттік тұрғын үй көмегіне үміткер азаматтың соңғы бес жыл ішінде меншігінде жылжымайтын мүлкі болмауы керек. Алайда кейбір азаматтар бірнеше пәтерден үлес иеленсе де, тұрғын үй кезегіне тұруға мүмкіндік тапқан.
Тексеру барысында осындай жағдайлардың бірі анықталған. Атап айтқанда, бір азаматтың 400 пәтерден үлесі болғанына қарамастан, ол мемлекеттік тұрғын үй кезегіне тұрған.
Осыған байланысты заңнамаға өзгерістер енгізіліп, жылжымайтын мүліктегі үлеске қатысты талаптар нақтыланған. Енді азаматтың тұрғын үйдегі үлесі оның жалғыз баспанасына қатысты болуы тиіс.
Жаңа талаптар мемлекеттік тұрғын үй қолдауын алуға құқығы бар азаматтарды әділ іріктеуге және заң талаптарын айналып өту әрекеттерінің алдын алуға бағытталған.
Бұл өзгерістер баспанаға мұқтаж азаматтарға арналған мемлекеттік қолдаудың мақсатты әрі әділ бөлінуін қамтамасыз етуге мүмкіндік береді.
