Павлодарда еркін күрестен Олимпиада қола жүлдегері Даулет Шабанбайға қатысты даулы іс бойынша сот процесі жалғасуда, деп хабарлайды Alash.kz.
Іс материалдарына сәйкес, биыл қыркүйек айында Ұлттық гвардияның үш қызметкері спортшыны қаладағы бір кафенің жанында тоқтатқан. Куәгерлердің айтуынша, Шабанбай мас күйде шулап, бейәдеп мінез көрсеткен. Патрульдің ескертулері бойынша спортшы дөрекі сөздер айтып, қызметкерлерге физикалық күш қолданған: бір әскери қызметшіні итеріп жіберген, патруль бастығын иыққа тебіп, бетінен ұрған, үшіншісінің көз аймағына соққы тигізген. Спортшыны ұстау үшін қосымша патруль шақырылып, оны жерге жатқызып, қолына кісен салған.
Сот талқылауы барысында мемлекеттік айыптаушы 42 жастағы спортшыға «Билік өкіліне күш қолдану» бабымен орта қауіпсіздік режиміндегі түрмеде төрт жылға бас бостандығынан айыруды сұрады. Шабанбай кінәсін толық мойындап, сот талқылауына қатыспаған, тек зардап шеккендердің алдында кешірім сұраған: «Мен тек кешірім сұраймын! Балалар, ренжімеңіздер», – деді спортшы.
Даулет Шабанбай спорттық мансабын бес жыл бұрын аяқтаған. Оның ең басты жетістіктерінің бірі – 2012 жылғы Лондон Олимпиадасындағы қола медаль.
